Suporta para sa mga apektado sa inflation, giseguro sa administrasyong Marcos

 MALAYBALAY CITY, Bukidnon (PIA)—Pinaagi sa tabang sama sa Conditional Cash Transfer ug Fuel Subsidies, nagpadayon ang gobyerno sa paghatag suporta sa mga sektor nga naapektuhan pag-ayo sa ‘inflation’ o pagtaas sa presyo sa palaliton.

Kabahin kini sa komprehensibong tubag sa administrasyon ni Presidente Ferdinand R. Marcos Jr., nga naglakip sa mga programa sa pagsugpo sa mga hagit sa nag-usab-usab nga klima ug sa pagdugang sa suplay sa pagkaon.

Sumala sa National Economic and Development Authority (NEDA), natala ang inflation sa 7.7 % niadtong Oktubre 2022. Mas taas kini og 0.8 % kung ikumpara sa bulan sa Septiyembre. Naa gihapon kini sa target sa gobyerno nga 7.1 ngadto sa 7.9 %.

Gipasabot sa NEDA nga kini tungod sa sitwasyon sa gawas sa nasud, lakip na ang pagsipa sa global inflation, ang nagpadayon nga gubat tali sa Russia ug Ukraine, ug ang epekto sa ekonomiya tungod sa COVID-19 pandemic, ug mga krisis nga gi-atubang sa atong nasud sama sa kada-ot tungod sa sunod-sunod nga mga bagyo.

Gipasalig sa Presidente ang iyang suporta sa mga mag-uuma ug sa tibuok sektor sa agrikultura aron matabangan sila nga makabangon gikan sa nangaging mga katalagman, samtang ang pagpalig-on sa ‘value chain’ o tanang elemento nga may kalabotan sa produksiyon sa pagkaon mao gihapon ang prayoridad.

Plano usab ni President Marcos ang pagpamuhunan sa bag-o nga mga teknolohiya dili lamang aron makab-ot ang seguridad sa pagkaon, apan aron usab madugangan ang kapasidad sa mga komunidad ug negosyo sa pagbatok sa mga hulga sa klima. 

Prayoridad sa gobyerno ang pag-ayo sa sistema sa pagdumala sa ‘water resources’ aron maminusan ang epekto sa pagbaha, pagdahili sa yuta, ug uban pang kadaot tungod sa tubig. Tungod niini, ang Presidente miingon nga gikinahanglan ang pag-establisar sa Department of Water Resources.

Gipasalig sa Presidente nga ang tibuok puwersa sa gobyerno magpadayon sa pagtutok sa inflation ug sa mga hinungdan niini, ug magpadayon usab sa paghimo og mga lakang aron maminusan ang epekto niini sa katawhan. (BGE/PIA-Bukidnon)

Administrasyong Marcos padayon sa paghatag suporta sa mga sektor nga naapektuhan pag-ayo sa inflation o pagtaas sa presyo sa palaliton, pinaagi sa tabang sama sa Conditional Cash Transfer ug Fuel Subsidies. (PIA)