Cebuano News: Mga mag-uuma sa Bukidnon nakakuha sa P4.5M rice dryer gikan sa DA NorMin

 MALAYBALAY CITY, Bukidnon (PIA)—Gitugyan sa Department of Agriculture sa Northern Mindanao (DA-NorMin) ang P4.5 milyones nga recirculating rice dryer ngadto sa Simaya Agrarian Reform Cooperative (Simaya ARC) sa barangay Simaya, Malaybalay City.

Ang pasilidad dunay drying capacity nga unom ka tonelada sulod sa 8-16 ka oras ug gipundohan sa Agribusiness and Marketing Assistance Division (AMAD) sa ahensya sa kantidad nga P2.78 milyones gikan sa Bayanihan 2 nga pundo, nga dunay counterpart sa kagamhanan sa dakbayan sa Malaybalay sa kantidad nga P1,763,025.

Si DA-NorMin Regional Executive Director Carlene C. Collado miingon nga ang Simaya ARC maoy usa sa pipila nga giila nga aktibo nga mga kooperatiba sa lokalidad, nga dunay 118 ka miyembro nga naglangkob sa mga 400 ka ektarya sa humay nga molapad ngadto sa kapin sa 700 ka ektarya ngadto sa silingang mga umahan nga barangay.

Ang Supervising Agriculturist sa DA-10 AMAD nga si Ferdinand Caraballe miingon nga ang mga kooperatiba ug asosasyon sa mga mag-uuma kinahanglang mo-agi sa proseso sa akreditasyon aron mahimong direktang makadawat sa mga proyekto sa gobyerno.

“Kinahanglang magparehistro ang atong mga mag-uuma sa Farmers and Fisherfolks Enterprise Development Information System (FEDIS) aron maka-access sa uban pang interbensyon, partikular na sa mga pasilidad nga may kalabotan sa bugas sama sa mga sentro sa pagproseso sa bugas,” matud niya.

Kini, sumala ni Caraballe, nag-qualify kanila alang sa collateral-free, interest-free nga pautang gikan sa Agricultural Competitiveness Enhancement Fund (ACEF) ug sa Agricultural Credit Policy Council (ACPC).

Mitambong usab sa kalihokan ang mga field officers gikan sa Bukidnon Provincial Operations Center sa DA-10 ug mga opisyal sa gobyerno sa Malaybalay City. (DA-10/PIA 10-Bukidnon)

Si Carlene C. Collado, Regional Executive Director sa Department of Agriculture-Northern Mindanao, ug mga opisyal sa Malaybalay City ang naghatud sa P4.5 million nga ‘recirculating rice dryers’ ngadto sa Simaya Agrarian Reform Cooperative. Ang mga rice dryer units gipundohan sa departamento sa kantidad nga P2.78 milyones gikan sa Bayanihan 2 funds, diin nag-counterpart usab ang Malaybalay City Government sa kantidad nga P1,763,025. (DA-10)