Cebuano News: P1.5M nga proyekto gikan sa BFAR-10 dakong tabang alang sa gabuhi og Tilapia

 MANOLO FORTICH, Bukidnon (PIA)—Gidawat sa Manolo Fortich local government unit (LGU) niadtong Disyembre 20 ang mga proyekto gikan sa Bureau of Fisheries and Aquatic Resources kon BFAR Region 10 sama sa fish solar dryer, processing shed, feed formulation, ug feed processing materials, ug uban pang ekipo sa gipahigayon nga turnover ceremony sa Rice Field Area sa Barangay Dicklum ning lungsod.

Mikabat sa P1.5 million ang balor sa nasangpit nga proyekto ubos sa programang Special Area for Agriculture Production kon SAAD.

Laraw sa BFAR 10 nga mahingusgan ang ‘Tilapia production and processing’ sa Manolo Fortich ug uban pang lungsod sa Bukidnon.

Sumala ni Bukidnon Provincial Fishery Officer Maryjoy Tac-an nga maayo ang panubig sa lungsod sa Manolo Fortich busa angayan matud pa nga mapalambo ang panginabuhian sa mga fisherfolks sa lungsod.

Malaumon si Tac-an nga mo-taas ang kinitaan sa Manolo Fortich Fishery Association pinaagi sa mga programa sa BFAR.

Samtang gibutyag ni SAAD Phase-1 Focal/District Fishery Technician Alfonsus Gonzaga nga gikinahanglan nga makakat-on og feed formulation ang mga fisherfolks sa lungsod pinaagi sa paggamit og organic materials nga naa lang makita sa palibot. Sa maong pamaagi, dili na makagasto og dako sa commecial feeds ang mga ga-buhi sa isda nga Tilapia.

Alayon niini, gibutyag ni Municipal Mayor Rogelio N. Quiño nga dili sayon ang pagbuhi og Tilapia isip panginabuhi-an tungod kay nanginahanglan matud pa kini og dakong kahibalo aron makakab-ot og dakong kita.

"When I started business, grabe gyud ang kwenintahay nga kinahanglan mokita gyud. Mao pud ni akong gusto mahitabo sa lungsod sa Manolo Fortich nga kung mag-invest ta mokita gyud ta. With this new technology in Tilapia hatchery production, kinahanglan makita nato kung unsa ang atong profitability sa pagbuhi sa Tilapia,” matud sa mayor.

Malaumon ang lokal nga pangagamhanan sa Manolo Fortich nga magmalampuson ang Tilapia production and processing sa nasangpit nga ‘field demo’ nga anaa nahimutang sa Barangay Dicklum.

Sa laing bahin, nagpasalamat si Rogelio Angcay, ang Presidente sa Manolo Fortich Fishery Association, sa mga proyekto alang nilang gabuhi og Tilapia. Dili na matud pa sila magproblema sa pagbulad sa ilang isda tungod kay magamit na nila ang ‘fish solar dryer’.

Gibutyag ni Angcay nga sa tuig 2018 sugod nga natagamtaman sa 46 ka miyembro sa ilang asosasyon ang mga program ug proyekto sa SAAD. Nanghinaot kini nga mapailawom silang mga miyembro og dugang mga trainings aron mas molambo pa ang ilang kahibalo.

Subay niini, gisaysay ni Municipal Agriculturist Gemma Cania nga sa pangatungdanan ni kanhi Mayor ug karon Bukidnon Vice Governor Clive D. Quiño, gipaningkamutan niini nga mapalit sa Manolo Fortich LGU ang 5.6 hectares nga luna sa barangay Dicklum alang sa pang-agrikultura nga programa sa LGU. Daghan matud pa ang matukod sa nasangpit nga umahan sama sa katukuran sa ilang research area.

"Sa karon nagsunod kita sa Devolution Transition Plan nato, kinahanglan ang matag munisipyo naa gyud siya'y research area for all Agri commodities including fishery," pamahayag ni Cania.

Mitambong sa nasangpit nga turnover si Sangguniang Bayan member Hon. Elzevir Dagunlay ang Committee Chair sa Agriculture uban si Konsehal Raquel Abales, pipila ka mga personahe sa BFAR Bukidnon, Municipal Agriculture Office ug miyembro sa Manolo Fortich Fishery Association. (Manolo Fortich LGU/PIA 10-Bukidnon)

Gidawat sa Manolo Fortich local government ang mga proyekto ug kahimanan gikan sa Bureau of Fisheries and Aquatic Resources kon BFAR Region 10 sama sa fish solar dryer, processing shed, feed formulation ug feed processing materials lakip ang mga ekipo niadtong Disyembre 20 nga gi-turnover didto sa Rice Field Area sa Barangay Dicklum. (Manolo Fortich LGU)