Cebuano News: Quezon youths nakiglambigit alang sa kalinaw ug kalambo-an

 QUEZON, Bukidnon (PIA)–Gibansay ang kapin gatos ka mga kabatan-onan sa Quezon, Bukidnon aron sila mahimo’ng maayo nga modelo o impluwensya sa ilang komunidad kay anaa nila ang ‘potential’ nga mahimong ‘leaders’ sa lungsod sa umaabot.

Kini atol sa gipahigayong tulo ka adlaw nga Youth Leadership Summit (YLS) 2022 nga nagsugod gikan Disyembre 20 hangtud 22 ning tuig.

Si Mayor Pablo “Poling” Lorenzo III miingon nga nakita niya ang malaumon nga kaugmaon sa lungsod ubos sa pagdumala sa mga bag-ong henerasyon nga mga lideres kay duna na silay kaalam sa angay pagabuhaton.

“Ang kabatan-onan ang kaugmaon sa lungsod busa kinahanglan sila giyahan ug dugang kahibalo nga makaandam sa ilahang ugma. Dinhi nagkat-on sila og sense of responsibility, pagkamabinantayon sa palibot, panaghigalaay, pagtinabangay, ug daghan pa nga para sa kaayohan sa mosunod nga henerasyon,” matud sa mayor.

Youth leadership summit gi-organisa sa Quezon LGU kauban ang Sangguniang Kabataan, Aktibong Kabatan-onan sa Quezon, POINTY Bukidnon ug 72nd Infantry Battalion sa Philippine Army, Disyembre 20-22. (Quezon LGU)

Gidasig usab niya ang mga kabatan-onan nga padayon tun-an ang mga bag-ong paagi sa pagkat-on kay “The more learning nga naa sa inyo, better for us. As a leader, know how to lead and how to help,” dugang ni mayor Lorenzo.

Sa maong YLS, mihatag og testimonya si Ariane Jane “Ka Marikit” ug ang iyang mga kauban sa ilahang mga kaagi sa kalihokan diin iyang gi-istorya nga nahisala-ag sila sa lahi nga dalan alang sa ilang maayong kaugmaon.

“Pinaagi niini nga panagtigom, malamdagan kami ug dili na mailad sa hiwi nga ideolohiya,” dugang ni Ariane Jane.

Kini nga YLS gi-organize sa Quezon local government unit ug sa 72nd Infantry Battalion sa Philippine Army pinaagi sa pakig-alayon sa Sangguniang Kabataan sa Quezon, Bukidnon, sa Aktibong Kabatan-onan sa Quezon (AKQU), ug Pointy Bukidnon. (Quezon LGU/PIA 10-Bukidnon)

Si Mayor Pablo “Poling” Lorenzo III miingon nga nakita niya ang malaumon nga kaugmaon sa lungsod ubos sa pagdumala sa mga bag-ong henerasyon nga mga leaders kay duna na silay kaalam sa angay pagabuhaton. (Quezon LGU)