Cebuano news: LTO, Lantapan LGU nagpahigayon ug libreng theoretical driving course

 Ni Mc Dharel L. Gildore

 

LANTAPAN, Bukidnon (PIA)--Kapin 200 ka mga residente gikan sa nagkalain-laing barangay sa Lantapan, Bukidnon, ang aktibong misalmot sa libreng Theoretical Driving Course (TDC) nga gipasiugdahan sa Land Transportation Office (LTO) sa pakigtambayayong sa lokal nga kagamhanan sa Lantapan.

 

Tumong niini nga maseguro nga ang mga serbisyo sa LTO daling mahatud sa tanang aplikante sa pagkuha sa Driver’s License, ilabi na niadtong nagpuyo sa hilit nga mga komunidad.

 

Ang TDC naghatag ug kahibalo bahin sa mga lagda ug regulasyon sa trapiko aron ang mga partisipante makakuha sa ilang Student Permit Driver's License (SPDL).

 

Atol sa TDC nga gipahigayon sa lungsod sa Lantapan bag-ohay pa lang, si LTO training officer Dyvid Ree Oncino mitudlo sa lain-laing mga warning signs sa kadalanan nga maoy kasagaran dili mahatagan ug importansya sa mga motorista.

 

Matod ni Lantapan Mayor Ernie Devibar, kini nga oportunidad usa ka pribilehiyo nga gihatag sa LTO sa mga indibidwal nga nga nagpakita sa disiplina ug pagsunod sa balaod trapiko.

 

Sa samang paagi, si LTO training officer Maricel Wilson mipahibalo sa mga motorista nga duna usab silay katungod sa pagpanalipod sa ilang kaugalingon pinaagi sa pagdasig sa mga motorista sa pagtaho ngadto sa mga hingtungdang ahensya sa higayon nga naay mga traffic enforcer nga nag-abuso sa ilang authority.

 

Dakong kalipay ug pasalamat sa mga misalmot sa libreng TDC dihang gidawat na nila ang ilang ‘Certificate of Completion.’

 

Samtang gisubli usab sa LTO ang pagpahinumdom sa tanan nga magbantay batok sa mga peke nga lisensya. (MDLG/PIA-10/Bukidnon)

Si LTO-Bukidnon training officer Maricel Wilson kusganong nag-awhag sa mga motorist-participants, atol sa libre nga outreach Theoretical Driving Course, nga mahimo silang mo-report kung naay mga traffic law enforcers nga nag-abuso sa ilang otoridad. (ANC/PIA-10/Bukidnon)