Cebuano news: Muleta Convergence Area Development Plan giduso alang sa ‘finalization’

 Ni Feb Benedict M. Angkig

 

DALWANGAN, Malaybalay City (PIA)--Usa ka workshop alang sa pagpalambo sa Muleta Watershed Convergence Area Development Plan (CADP) ang gipahigayon sa Dalwangan, Malaybalay City, Bukidnon, niadtong Mayo 16–19, 2023.

 

Gipangunahan sa National Convergence Initiative for Sustainable Rural Development (NCI-SRD), ang workshop gitambongan sa mga miyembro sa Regional Convergence Initiative Technical Working Group (RCI-TWG), nga gilangkuban sa Department of Agriculture (DA-10). isip lead convener ug gipangulohan ni DA-10 Regional Executive Director Carlene C. Collado.

 

Ang ubang mga miyembro naglakip sa Department of Interior and Local Government (DILG-10), Department of Environment and Natural Resources (DENR-10), ug Department of Agrarian Reform (DAR-10), uban sa mga opisyal sa local government unit (LGU) sa Pangantucan.

 

Tumong sa workshop nga madugangan ang kahibalo sa misalmot sa NCI-SRD ug ang Manual of Operations niini, paghimo og inisyal nga draft sa gikinahanglan nga mga seksyon sa CADP, ug pagtakda og mga timeline alang sa pagpalambo sa CADP.

 

Gipahayag ni DA-10 Regional Technical Director for Operations Carlota S. Madriaga nga gikinahanglan ang pakigtambayayong sa RCI-TWG ug sa LGU aron makab-ot ang gitinguhang resulta sa sugyot.

 

“Ang DA isip maoy nanguna nga tigpasiugda, nagpasalamat sa inyong partisipasyon sa pagtapos sa CADP alang sa Muleta Watershed. Kini maoy mga pamaagi ug proseso nga nagpasabot nga kinahanglan namo ang inyong input aron mamugna ang kinahanglan nga mga detalye nga gikinahanglan sa proposal sa CADP,” miingon si Madriaga.

 

Tungod niini, Iyang gidasig ang mga partisipante, ilabina ang mga opisyal sa munisipyo ug mga barangay nga nakabenepisyo, nga makig-communicate sa mga ahensya mahitungod sa ilang mga panginahanglanon sa agrikultura ug uban pang mga watershed concerns.

 

Sa laing bahin, sa usa ka mensahe sa video, si DA Assistant Secretary for Operations ug ang National Focal Person sa NCI-SRD, Arnel V. de Mesa, nag-awhag sa tanan sa paghatag sa ilang pinakamaayong paningkamot sa pagtapos sa Muleta Watershed CADP samtang naglaum siya alang sa hinanaling pag-approve niini.

 

Midugang siya nga importante ang paghimo ug piho nga mga programa, kalihokan, ug mga proyekto sulod sa convergence area samtang gikonsiderar ang tanang ecosystem niini pinaagi sa pagpadagan sa Ridge-to-Reef approach.

 

Si Teodoro B. Quirante III, Pangantucan municipal agriculturist, miingon nga ang pag-approve sa Muleta Watershed CADP makahuloganon kaayo alang sa munisipyo.

 

"Ang Muleta watershed usa ka mahinungdanong tinubdan sa tubig alang sa komunidad. Alang sa mga mag-uuma, kini ang ilang tinubdan sa irigasyon, ug alang sa tibuok komunidad, kini ang atong tinubdan sa mainom nga tubig ug uban pang panginahanglan sa industriya. Busa, ang pagpanalipod ug pagpreserba niini atong prayoridad," dugang niya.

 

Sa pagkakaron, ang Muleta Watershed CADP naa na sa katapusang mga yugto niini, diin ang mga komento ug sugyot gikan sa National Technical Working Group (NTWG) kinahanglang sulbaron.

 

Human sa pagkumpleto sa gikinahanglan nga mga detalye, ang CADP ipasa ngadto sa National Steering Committee alang sa pagsusi ug pag-aproba. (DA 10/FBMA/PIA-10/Bukidnon)

 

Ang RCI-TWG aktibong misalmot sa workshop aron ma-finalize ang Muleta CADP alang sa kalamboan sa agrikultura, panginabuhi-an, ug uban pang mga industriya nga naa sa Pangantucan ug silingang mga dapit sa lungsod sa probinsya sa Bukidnon. (DA-10)