Cebuano News: DOLE-Bukidnon mihatag og P17M ayuda ngadto sa mga trabahanteng kabus

 By Johnson B. Adviento

MALAYBALAY CITY (PIA)--Para sa unang semester sa 2023, ang Department of Labor and Employment (DOLE) nag-apod-apod og P17,665,000 nga livelihood grants ngadto sa mga kabus nga trabahante ubos sa DOLE Integrated Livelihood Program (DILP) o Kabuhayan Program gikan sa nagkadaiyang barangay sa probinsya sa Bukidnon.

Matud ni Raul Valmores, ang provincial director sa Bukidnon Provincial Field Office (BukPFO), ang DILP nakatabang sa 1,380 ka benepisyaryo gikan sa nagkalain-laing lungsod sa Bukidnon sa unang semester sa 2023 sa tumong nga makasugod, mopa-usbaw, ug molambo ang mga proyekto sa panginabuhian.

"Ang 1,380 nga nakadawat naglakip sa mga ubos og kita, mga kanhi rebelde, mga nakagamit sa ginadiling droga, ug mga ginikanan sa mga bata nga trabahador kon ginikanan sa mga child laborer. Basin mosaka ang ang gidaghanon sa mga benepisyaryo sa mosunod nga quarter isip resulta sa atong padayon nga orientation, profiling, ug evaluation sa mga potensyal nga benepisyaryo," sumala ni Valmores.

Baynte ka asosasyon nga gilangkuban sa 653 ka benepisyaryo; 701 ka ginikanan sa mga bata nga trabahador; ug 26 ka ubos ang kita, ang nakadawat og grants alang sa ilang panginabuhian. Kini nga mga asosasyon naa nagtrabaho sa nagkalain-laing proyekto sama sa produksyon sa mga chicken broiler, mga pananom, pag-alima sa mga hayop, ug mga consumer stores.

"Among gidasig ang mga nakadawat nga pahimuslan ang suporta sa panginabuhian nga gihatag kanila. Bulahan sila. Ang ilang katungdanan mao ang pag-atiman sa ilang mga proyekto aron mabuhi," dugang ni Valmores.

Si Vicente Caguimbaga Jr., presidente sa First San Miguel Agrarian Reform Beneficiary Farmers Association (First SMARBEFA), nagpasalamat sa gobyerno tungod sa ayuda.

"Kami sa among asosasyon, mapasalamaton sa DOLE kay tungod niini madugangan ang among panginabuhian. Kini nga proyekto, amo gyud ning alimahan aron mudagayday kini ug molungtad sa taas nga panahon.

Ang First SMARBEFA gilangkoban sa mga mag-uuma ug nakadawat sa repormang agraryo nga Lumad. Usa ka grant nga P250,000 ang gihatag sa asosasyon alang sa ilang rice trading nga naghatag og dugang kita sa panahon sa pre-harvest.

Atol sa pag-turnover sa P375,000 livelihood aid ngadto sa 25 ka mga ginikanan sa mga child laborer, nagkatapok sila si Department of Labor and Employment (DOLE-10) Bukidnon Provincial Field Office Community Facilitator Clebel Guinayon (left), Sumilao Public Employment Service Office (PESO) Manager Cyril John Noval ug Accredited Co-Partner Valencia Rural Improvement Multi-Purpose Cooperative (VRI-MPS) Amparo Magdadaro alang sa ‘keepsake snapshot.’ (DOLE-10 BukPFO)

Ang mga inisyatiba gihimo uban sa tabang sa Abag Kalambuan Inc. ug Valencia Rural Improvement Multi-Purpose Cooperative, accredited co-partners. Sila ang responsable sa pagpangita ug pagpalit sa mga suplay, kagamitan, ug mga input nga gikinahanglan aron hingpit nga mag-operate ang komersyal nga mga kalihokan.

Si Mark Anthony Combong, ang focal person sa DILP, miingon nga ang mga kwalipikado mao ang mga kabus, mga “vulnerable ug marginalized” nga mga empleyado, ug naa sa mga informal sector. Ang mga potensyal nga empleyado mahimong mokontak sa DOLE-10 Bukidnon Provincial Office sa koordinasyon sa Public Employment Service Office sa ilang mga lungsod.

Ang mga flagship program sa DOLE sama sa DILP ug Kabuhayan Program, motabang sa mga grupo sama sa mga self-employed, walay suweldo nga mga trabahante sa pamilya, ubos og sweldo ug seasonal nga mga trabahante, mga bakwit o mga tawo nga gustong mobakwit, mga kabus nga mag-uuma ug mga walay yuta,  mga mangingisda, kababayen-an ug batan-on, mga tawo nga dunay disability, senior citizens, lumad nga katawhan, biktima sa gubat, rebel returnees, ug mga ginikanan sa mga child laborers.

“Mahimong maatiman sa mga benepisyaryo ang ilang dugay nang gikinahanglan nga panginahanglan. Salamat sa aksyon sa gobyerno,” dugang sa First SMARBEFA. (JBAdviento/Malaybalay LGU/DOLE BukPFO/PIA 10/Bukidnon)

 Lambo Damulog! Department of Labor and Employment-BukPFO Chief  Raul Valmores (2nd from left), Damulog Mayor Melino Buro (2nd from right), Damulog Public Employment Service Office (PESO) Manager Andrei Jamisola (center), accredited co-partner Abag Kalambuan Inc., Chairperson Beinvenido Narciso (leftmost) and representative from the association beneficiary ‘Maayong Lakang sa Barangay Association’ (rightmost) show the “Lambo sa Damulog” hand sign during the turnover of P500,000 DILP to Maayong Lakang sa Barangay Association for their consumer store project at Damulog, Bukidnon, 14 June 2023. (DOLE-10 BukPFO)