Cebuano News: DOST, Bukidnon solon mipahigayon sa ‘Silyang Pinoy’ training

 By Johnson B. Adviento

MALAYBALAY CITY,(PIA)--Ang Department of Science and Technology ug si First District Representative Jose Manuel "Joeman" Alba, nagtinabangay alang sa pagpahigayon sa pagbansay sa mga ‘local furniture makers’ sa probinsya aron mahimong hanas sa pagbuhat sa gitawag nga “Silyang Pinoy.

Kapin singkwenta ka mga partisipante ang nagtinabangay sugod Hulyo 11 hangtod 16 alang sa paghimo sa ‘engineered’ nga tabla hinimo gikan sa kawayan nga maoy materyales sa pagpanday sa mga lingkuranan ug lamesa.

Pagka-Hulyo 24 hangtud 28, ang nasangpit nga mga partisipante gitudlo-an na sa mga pamaagi ug aktuwal nga produksyon sa mga muwebles didto sa Bamboo Pavilion sa Damilag, Manolo Fortich, Bukidnon.

 Ang mga partisipante, trainer, ug organizer sa Phase I Training sa ‘engineered bamboo production’ nagkahi-usa sa tumong nga mas molambo pa ang industriya sa kawayan sa Bukidnon. (DOST 10-Bukidnon)

Pagkahuman sa ilang pagbansay, naghimo sila og duha ka lamesa ug lingkuranan nga gidisenyo alang sa elementarya ug laing lamesa ug duha ka lingkuranan alang sa high school. Kini nga mga produkto naa na karon gi-display sa Bamboo Pavilion sa Manolo Fortich, Bukidnon.

Ang Silyang Pinoy nga gihimo gikan sa kawayan daghan kaayo’g gamit labi na ang mga lingkuranan ug lamesa. Pwede pud maghimo ang mga panday ug mga lain-laing disenyo sa muwebles. Kini nga mga lingkuranan nga nailhan nga “engineered bamboo,” nagsuporta sa inisyatiba sa gobyerno aron madasig ang katawhan sa paggamit og eco-friendly nga mga materyales.

Kini nga kooperasyon tali sa 1st District of Bukidnon ug DOST-10 maoy pinaka-unang proyekto sa Silyang Pinoy sa Northern Mindanao.

Silyang Pinoy nga mga sample nga gihimo sa mga trainees human sa 5 ka adlaw nga bamboo furniture-making ug skill-building sessions naa karon gi-display sa Bamboo Pavilion, Damilag, Manolo Fortich, Bukidnon. (DOST 10-Bukidnon)

Tumong sa mga ‘trainees’ nga magsugod na sa paghimo og daghang Silyang Pinoy aron matubag ang panginahanglan sa Department of Education nga gilatid sa Executive Order 879.

Sumala sa Executive Order, 25 porsiyento sa mga lingkuranan ug lamesa sa publikong eskwelahan kinahanglang gama gikan sa kawayan.

Uban sa paningkamot ni Cong. Alba ug DOST-Bukidnon, ang aktibidad naghi-usa sa mga lokal nga ‘bamboo furniture artisan’ sa 1st District kauban ang mga eksperto gikan sa DOST-Forest Products Research and Development Institute (DOST-FPRDI).

Ang pinakatumong sa gipahigayong specialized training mao ang pagtudlo sa mga partisipante kung unsa ang mga pamaagi ug techniques sa paghimo sa mga muwebles gamit ang “engineered bamboo” kon paghimo’g tabla gamit ang kawayan.

“Karong panahona, nagpadayon ang mga isyu sa pagpamutol sa mga kahoy tungod kay makita gihapon nato ang mga muwebles nga hinimo gikan sa kahoy kon hardwood, dili lang sa mga mall kondili bisan sa mga rural areas. Busa, aktibo kami nga nangampanya alang sa’engineered’ nga kawayan aron matubag ang mga isyu sa pagputol sa kahoy. Among gipasiugdahan ang pagproseso sa kawayan tungod kay gusto namo nga makamugna ug daghang mga muwebles gikan sa kawayan isip usa ka malungtarong alternatibo sa mga hardwood,” sumala si Alba.

Ang DOST naningkamot nga magpasiugda sa kabag-ohan aron magpadayon ang industriya sa kawayan ug matabangan ang mga tig-gama sa muwebles sa paghimo og usa ka mauswagon nga kaugmaon alang sa Bukidnon.

Usa ka public hearing kalabot sa commercialization sa’Silyang Pinoy’ ang gikatakda sa Manolo Fortich ning bulan sa Agosto. (JBAdviento/Malaybalay LGU/PIA 10/Bukidnon)

Bukidnon 1st District Representative Jose Manuel "Joeman" Alba ug mga kawani, uban ni DOST-Bukidnon Provincial Director Ritchie Mae L. Guno sa bamboo poles stock area sa Bamboo Pavilion, Damilag, Manolo Fortich, Bukidnon. (DOST 10-Bukidnon)