400 ka mga BIO sa MisOr ug CdeO nakiglambigit sa asembliya nga gipahigayon sa PCO

Ni Bernadith G. Epan

MALAYBALAY CITY (PIA) -- Kapin 400 ka mga Barangay Information Officer (BIO) gikan sa Misamis Oriental ug dakbayan sa Cagayan de Oro ang nakiglambigit alang sa Barangay Information Officers Network (BION) Assembly niadtong Nobyembre 21.

Tumong sa kalihukan ang pagpahugot sa komunikasyon sa ‘grassroots’ ug paghatag pasidungog sa paningkamot sa mga barangay-level nga information officer diha sa pagpakaylap sa kalambuan sa ilang mga komunidad.

Ang Presidential Communications Office (PCO), pinaagi sa Philippine Information Agency (PIA), maoy nanguna sa pag-organisar sa BION Assembly 2024.

Kapin 400 ka mga Barangay Information Officer (BIO) gikan sa Misamis Oriental ug dakbayan sa Cagayan de Oro ang nakiglambigit alang sa Barangay Information Officers Network (BION) Assembly niadtong Nobyembre 21. (Photo: DCC/PIA-10)

Sa ngalan ni PCO Secretary Cesar Chavez, si PCO Assistant Secretary for Cultural Affairs and International Engagements Rowena Hidalgo-Otida mi-presenta kung unsa kining "Proud to be a Bagong Pilipino in a Bagong Pilipinas."

“What is Bagong Pilipinas? It is regaining pride in being Filipino. It is nurturing a culture of affirmation and a rejection of self-deprecation. It is trusting the government for leadership but accepting the citizen’s part of the program. It is setting excellence as the goal in personal, community, and national life,” matud ni Hidalgo.

(Unsa ang Bagong Pilipinas? Ang Bagong Pilipinas mao ang pag-angkon pag-usab sa garbo sa pagka-Pilipino. Kini mao ang pag-amuma sa kultura sa pagdawat ug pagbiya sa kaugalingong pagdaot. Kini mao ang pagsalig sa gobyerno alang sa liderato apan pagdawat usab sa responsibilidad sa mga katawhan. Kini mao ang pagtuyok sa kahusayan isip tumong sa personal, komunidad, ug nasyonal nga kinabuhi.)

Si PIA Assistant Director-General for Legal Affairs and Special Concerns Atty. Allan Vincent Lorenzo maoy keynote speaker sa maong asembliya. Iyang gipasabot kung unsa ang Ambisyon Natin 2040 ug ang Bagong Pilipinas.

“The Bagong Pilipinas governance is seeking the help of the barangay information officers (BIOs) to help attain the leadership agenda consistent with the Ambisyon Natin 2040, which represents long-term vision and aspirations of the Filipino people for themselves and for the country in the next 25 years: Matatag, maginhawa, and panatag na buhay. In Visayan dialect, it means kalig-on, kahamugaway, ug sigurado nga kinabuhi,” miingon si Lorenzo.

Gibutyag usab niya nga ang barangay information officers makasuporta sa gobyerno sa pagpakaylap sa husto ug tukma nga impormasyon bahin sa mga programa ug serbisyo nga gitanyag ug gipasiugdahan sa tanan nga ahensya sa gobyerno, lakip na ang mga government-owned and controlled corporations, state colleges ug universities, ug local government units.

Iyang gi-explain kung unsa ka-importante ang grassroots communication.

“Dako kaayo ang inyong papel sa pagpakaylap sa tinuod ug takdang impormasyon bahin sa mga programa, proyekto, serbisyo, ug polisiya sa gobyerno nga nagtumong sa paghatag gahum sa katawhan aron makabuhat og tukma nga mga desisyon,” dugang ni Lorenzo.

Sa wala pa ang mga diskusyon, aktibong mi-participate sa pagpaambit ang mga BIO sa ilang mga interpretasyon sa Bagong Pilipinas ug sa mga kalidad nga naghulagway sa usa ka Bagong Pilipino.

Matud ni Information Officer Cyril Cambalon Jr. gikan sa Villanueva, ang usa ka Bagong Pilipino kabalo sa pag-ila sa tinuod ug bakak nga balita pinaagi sa lainlaing mekanismo.

“Ang Bagong Pilipino mao kadtong hingpit nga nakasabot sa mga isyu sa atong komunidad,” matud niya. Gibutyag usab ni Cambalon ang iyang pasalamat sa pagpatigayon sa BION.

“Ang BION Assembly naghatag kanamo og giya isip barangay information officer, nga maoy tinubdan sa balita ug impormasyon nga angay mahibal-an sa tanan,” miingon siya.

Gipasidunggan usab sa Probinsya sa Misamis Oriental ang mga paningkamot sa barangay information officers atol sa BION Assembly, labi na sa paningkamot sa kasamtangang administrasyon nga mo-ubos ang poverty incidence ngadto sa single digit.

Sa ngalan ni PCO Secretary Cesar Chavez, si PCO Assistant Secretary for Cultural Affairs and International Engagements Rowena Hidalgo-Otida mi-presenta kung unsa kining "Proud to be a Bagong Pilipino in a Bagong Pilipinas." (Photo: DCC/PIA-10)

“Ang atong mga Barangay Information Officers dunay dakong papel sa pagdugtong sa kal-ang kon ‘gap’ tali sa gobyerno ug sa atong mga komunidad. Kamo mao ang mata ug dunggan sa atong lokal nga pangagamhanan, nga nagpasiguro nga ang mahinungdanong impormasyon makaabot sa matag suok sa atong probinsya,” matod ni Misamis Oriental Provincial Information Office Consultant Roy Waga, nga nagrepresentar kang Gov. Peter M. Unabia.

Gipahayag ni Waga nga ang ilang aktibo nga pag-apil isip information officers usa sa mga hinungdan aron ma-achieve ang mga mithi sa kagamhanan.

Ang Dakbayan sa Cagayan de Oro mipadayag usab sa suporta alang sa BION 2024. Si City Administrator Atty. Roy Hilario Raagas nagrepresentar kang Mayor Rolando A. Uy.

Gidayeg ni Raagas ang aksyon sa PCO sa pag-ila sa kamahinungdanong papel sa BIOs sa pagpakaylap sa impormasyon ngadto sa ilang tagsa-tagsa ka barangay. Matud ni Raagas nga importante kaayo kini alang sa pagpakaylap sa mahinungdanong impormasyon gikan sa barangay level ngadto sa nasyonal nga kagamhanan ug sa lainlaing komunidad. (BGE/PIA-10/Bukidnon)

Si Atty. Allan Vincent Lorenzo, Assistant Director-General for Legal Affairs and Special Concerns sa Philippine Information Agency, mao ang keynote speaker atol sa gipahigayong Barangay Information Officers Network (BION) assembly, diin kapin 400 ka mga Barangay Information Officers gikan sa  sa Cagayan de Oro City ug Misamis Oriental ang mitambong. (Photo: DCC/PIA-10)