Cebuano news: 965 ka mga farmers sa Bukidnon nakadawat og 'cash assistance'

MALAYBALAY CITY (PIA)--Mikabat sa 965 ka mga mag-uuma sa Maramag, Bukidnon ang nakadawat og P5,000 nga cash assistance matag usa niadtong Mayo 9, isip hinabang gikan sa Department of Agriculture-Northern Mindanao.  

Matud ni DA-10 Regional Executive Director Carlene C. Collado, ang kapin P4.8 milyones nga cash aid gihatag sa DA ngadto sa mga kwalipikadong mag-uuma sa humay ning probinsya pinaagi sa Rice Farmers' Financial Assistance (RFFA) program sa DA.  

Ang mga mag-uuma sa humay nga rehistrado sa RSBSA nga nagtikad sa dili molapas sa duha ka ektarya nga talamnan ang kwalipikado nga makadawat sa tabang.  

Ang RFFA kabahin sa padayong paningkamot ug estratehiya sa DA aron madugangan ang produksiyon sa bugas sa nasud taliwala sa naobserbahan nga pagtaas sa presyo sa mga input sa umahan ug hagit nga kahimtang sa panahon. Kini gipundohan pinaagi sa Rice Tariffication Law (RTL).  

Ubos sa maong balaodnon, ang sobra nga taripa nga makolekta sa imported nga bugas igahin isip cash subsidy sa mga mag-uuma sa bugas sulod sa unom ka tuig gikan sa 2019 hangtod 2024.  

Matod ni Luis Estenzo, usa ka 74-anyos nga mag-uuma sa humay, ang pagbayad sa RFFA tukma kaayo sa panahon sa ting-ulan.  

"Ako ni ipalit og abono ang akong nadawat nga hinabang kay padulong na ko magsabwag. Pasalamat ko sa DA kay dako kaayo ni nga tabang sa mga mag-uuma sama nako," matud ni Estenzo.  

Sa kasamtangan, ang DA-NorMin nakapagawas ug kinatibuk-ang P164.795 million nga cash aid sa 32,959 ka mga mag-uuma sa humay sa tibuok Northern Mindanao. (BGEpan/PIA-Bukidnon)

Mikabat sa 965 ka mga mag-uuma sa Maramag, Bukidnon ang nakadawat og P5,000 nga cash assistance nga hinabang matag usa niadtong Mayo 9 gikan sa Department of Agriculture-Northern Mindanao. (DA-10)